🕊️ نمازِ جنازہ کا طریقہ

نمازِ جنازہ فرضِ کفایہ ہے — یعنی کوئی ایک بھی ادا کر لے تو سب بَرِیُّ الذِّمَّہ ہو گئے، ورنہ جن جن کو خبر پہنچی تھی اور نہیں آئے وہ سب گنہگار ہوں گے۔ اس کے لیے جماعت شرط نہیں، ایک شخص بھی پڑھ لے تو فرض ادا ہو گیا۔ اس کی فرضیت کا انکار کفر ہے۔ (بہارِ شریعت ج۱ ص۸۲۵)

• دو رُکن: (۱) چار بار "اللہُ اَکْبَر" کہنا (۲) قیام۔
• تین سنّتِ مؤکدہ: (۱) ثناء (۲) درود شریف (۳) میِّت کے لیے دعا۔

نیّت: "میں نیّت کرتا ہوں اِس جنازے کی نماز کی واسطے اللہ عَزَّوَجَلَّ کے، دُعا اِس میِّت کیلئے، پیچھے اِس امام کے"

• امام کی جگہ: میِّت کا سامنے ہونا ضروری ہے، غائبانہ نمازِ جنازہ نہیں ہو سکتی۔ مستحب یہ ہے کہ امام میِّت کے سینے کے سامنے کھڑا ہو۔
• صفیں: بہتر یہ ہے کہ جنازے میں تین صفیں ہوں — حدیثِ پاک میں ہے: "جس کی نماز (جنازہ) تین صفوں نے پڑھی اُس کی مغفرت ہو جائے گی۔" جنازے میں پچھلی صف تمام صفوں سے افضل ہے۔
• کندھا دینے کا ثواب: "جو جنازے کو چالیس قدم لے کر چلے اُس کے چالیس کبیرہ گناہ مٹا دیئے جائیں گے۔" اور جو جنازے کے چاروں پایوں کو کندھا دے اللہ عَزَّوَجَلَّ اُس کی مستقل مغفرت فرما دے گا۔
• کندھا دینے کا طریقہ: سنّت یہ ہے کہ یکے بعد دیگرے چاروں پایوں کو کندھا دے اور ہر بار دس دس قدم چلے — پہلے سیدھے سِرہانے، پھر سیدھی پائنتی، پھر اُلٹے سِرہانے، پھر اُلٹی پائنتی؛ کُل چالیس قدم۔
• مسبوق (دیر سے آنے والا): اپنی باقی تکبیریں امام کے سلام پھیرنے کے بعد کہے؛ اگر اندیشہ ہو کہ دعا پڑھنے کی صورت میں لوگ جنازہ اُٹھا لیں گے تو صرف تکبیریں کہہ لے، دعا چھوڑ دے۔